تذكر كسرها ..ومحنة دهرها.. اتعنه القبرها.. وراح حسين
يجر حسرة.. على الزهرة
***
قبل ما يمشي ويهاجر ابواليمة.. راح بدمعته يودع قبر أمه
وذاك القبر اول ما وصل يمه.. انحنه على اترابه يجري الدمع ويشمه
روحه الحزينة.. باتت رهينة ..جمرة وننية ..دمع العين
جرى العبرة.. على الزهرة
***
يم قبر الوديعة هايم المظلوم.. مثل طير اليطل على القبر ظل يحوم
يريد يودع أمه ويشكي عدها هموم.. وناداها بقلب شايل جرح ملجوم
قرب غيابي جيت بعذابي أعرض مصابي وهضم البين
عرض أمره.. على الزهرة
***
صاح وقلبه مو كد بي حزن مسجون.. اجيتج والدمع دم وجمر
وحق محسن اخوية وضلعج المكسور .. احس الدنيا بعدج ظلمة وبلا نور
هضمة زماني.. عايش تراني.. والهم لفاني.. من صوبين
القلب جمرة.. على الزهرة
***
ناوي على السفر وامجهز ضعوني.. واهل الغدر بين أمرين خيروني
لو عيشة بمذلة عمر يردوني.. لو أنطي الدمة وبالطف يوذروني
لو ذلة عمري.. لو انطي نحري.. خيرني دهري.. بين ثنين
عرض فكرة.. على الزهرة
***
ظهر من القبر صوت ونده يبني .. قبلك هم تراني الدهر خيرني
ارفضت جوره وهوانة وتالي عذبني.. ولجل هذا السبب كسروا ضلع مني
هاي انا همي.. كل عمره يمي.. خيرني خصمني.. بين أمرين
محن كثرة.. على الزهرة
***
جاوبها بعد ماظل عمر ينفع.. بعد ساعات أمشي بهالضعن وأطلع
لاشك بالسيوف هناك اتقطع.. يايمة الوعد وياج بالمصرع
لمن تجيني.. وتشاهديني.. مصوب جبيني.. بذاك الحين
كشف سره.. على الزهرة
***
ظهر صوت الوديعة من قلب مجروح.. يارت انظر جبينك ياشريك الروح
لجن ألقاك مخضوب بدمة ومذبوح.. وبلا راس جسمك عالارض مطروح
بالطف احضرك.. مذبوح انظرك.. دم يجري نحرك.. جتني منين
غصص مرة..على الزهرة
***
ودع قبر أمه ودم تصب عيناه.. أخذ قبضة من تراب القبر وياه
وحاير يلتفت عن يسرته ويمناه.. يتخطى على الراس النحب والويلاه
ودعها الامه.. يتخطى جدمه.. ثار ويهمه.. يقصد وين
نظر نظرة.. على الزهرة
الشاعر: الأديب جابر الكاظمي
