می قرب یار اله مست اولار

مِی قُربِ یاریله مست اولان وطن آیریسی، وطن ایستمز
کفنِ شهیدِ رهِ وفا، خس و خار اولار کفن ایستمز

هر او عاشقی که الستیده، اولا یار الیله پیاله نوش
غم و دردِ عشقِ نگاریله هامی عمرونی دولانار خموش

که حریرِ خونیله تا اولا، تنِ چاک چاکیله حُلّه پوش
او حریرِ پیرهنین گئیر، داخی اوزگه پیرهن ایستمز

یارالی حسین...

*****

کفنِ شهیدِ رهِ وفا ، سرِ کوی یار غباریدی
وطن آیرسی اولان عاشقین، وطنی دیارِ نگاریدی

گَله هر بلا گوره هر جفا، هاموسی عنایتِ یاریدی
گِله ایلمز، غمِ دل یِمز، کفن ایستمز، وطن ایستمز
کفنِ شهیدِ رهِ وفا، خس و خار اولار کفن ایستمز

یارالی حسین...

*****

من اگر چه بزمِ الستیده، مِی جامِ عشقیله مستیدیم
هوسِ شرابِ الستیله، من ازلده باده پرستیدیم

او قدحِ شرابنی نوش ایدن، داخی باده‌ی کهن ایستمز
من ازلده محفلِ عشقیده غمِ یار حلقه بگوشی یم

هامی کوه و دشتی دولانمیشام، رهِ دوست خانه بدوشی یم
دل و جان زباندی ولی اوزوم، غمِ عشق یار خموشی یم

ایله جان هوای لقاده دور که حریمِ جان و تن ایستمز

ای جانم، حسین ای جانم

*****

نه گوروبدی چرخِ کهن گوزی بیله لاله لر، بیله ژاله لر
نه بیله لُبالب اولوب مِیِ خُمِ وحدتیله پیاله لر

نه سحر صبا اَلینه دوشوب بیله سرخ فام کلاله لر
بو کلاله لر بیله ژاله لر، گُلِ سوری و سمن ایستمز

نه اولار بو جمعِ ستوده تک، بیری آشنای غمِ نگار
نه جهاندا اهلِ محبّته یِتوشر بولار کیمی لطفِ یار

نه اولار داخی رهِ عشقیده بولار اشتیاقیده جان نثار
که متاعِ جانینی دلبره، هامی بذل ایدوب ثَمَن ایستمز

پَر آچوبدی مرغِ دل ایستوری، ایده ترکِ کنجِ قفس گیده
داخی کاروانِ حیاتیدن کسیله صدای جرس گیده

یری وار فضاده ولی قالا، هامی عالَمِینه بو سس گیده
که سلوکِ راهِ وفا ایدن، رهِ دیو و اهرمن ایستمز

من او مستِ جامِ محبّتم، غمِ عشقِ یاریدی دولتیم
که محبّت اهلینی حشره تک ایده جاقدی جذب، محبّتیم

هامی اهلِ عشق و محبّته یته جاقدی لطف و عنایتیم
اودی گوز تیکوب منه معتکف غمه چاره اوزگه دن ایستم