مضطفی دن چاتدی ارثیه زینب است

مصطفادن چاتدی ارثیه بلاغت زینبه
مرتضادن چاتدی دریای شجاعت زینبه
حضرت زهرا آناسیندان شهامت زینبه
مجتبادن روح بی باک و صلابت زینبه
چاتدی ارثیه حسیندن خون غیرت زینبه

گوش عالم ایندیده وار خطبه نغزینده دی
جمله لقمانلار کلاس پند و اندرزینده دی
گنج های علم عالم زینبون مغزینده دی
باش اگر علامه های کل عالم زینبه
فخر ائدر بیر لحظه شاگرد اولسا ، مریم زینبه

بار سنگین بلا خم وئرمدی ابروسینه
اولدی غم موجی اثرسیز همت اقیانوسینه
مثل عنقا گتدی کرکس لر باشین زانوسینه
یعنی باش اندیردی تسلیم اولدی دشمن زینبه
سسلدی چوخ یرده دشمنلرده احسن زینبه

ایلدی دائم تلاطم موجی لی دریا کیمی
پاسدار اولدی حریم عصمته سقا کیمی
ولوله دنیایه سالدی خطبه سی مولا کیمی
اوغلی ، قارداشی ئولنلر اولدی لشکر زینبه
افتخار ایتدی سخن بزمینده حیدر زینبه

بیر مجلل مجلس ائتمشدی او گون بر پا یزید
فکر ائدوردی چون اولوبدور حاکم دنیا یزید
هئچ اینانموردی او مجلسده اولا رسوا یزید
ایستسه الله عدولر موجبات خیر اولار
حاصل سعی و تکاپوسی نصیب غیر اولار

حس پیروزی ائدوردی بزمیده بازنده لر
مدح ائدوردی آل سفیانی دنی خواننده لر
دوره ده ؛ نیزه الینده دیو خو درنده لر
غرقیدی قاره ئورکلر منجلاب کینه ده
قورخوسوندان حبس اولونمشدی ؛ نفسلر سینه ده

ائتدی فرمایش مبادا قلبوزی وحشت سیخا
ئولمیوب زینب هله گوزیاشلاروز گوزدن آخا
آههیمیله اودلارام هر کیم سیزه گر چپ باخا
قورخمیون؛ آغلاشمیون افغانه احساسیم گلر
لازم اولسا سسلرم نهر اوستن عباسیم گلر

باش اگوردی هی یزیده اهل بزمون تک تکی
چوخ غروریله اوتورمشدی دمشقون دلقکی
آیری عالملرده سیر ایلوردی مغز کوچکی
گه تمسخرله باخوردی مرتضی اولادینه
فکر ائدوردی اود وروب آل علی بنیادینه

رگلرینده مرتضی دلبندینون جوش ائتدی قان
جنگجو بیر پهلوان تک دوردی یردن ناگهان
فرض ایله قوزاندی یردن شعله آتشفشان
گوئیا ایستور ائیده بوبکری رسوا فاطمه
سسلدی قولباغلی قیزلار هاموسی یا فاطمه ۲

باخدی غیضیله دئدی یوم آغزوی آزدون یزید
آزماسیدن گر بو قدری خودسر اولمازدون یزید
خیزرانیلن بو گون ئوز قبرووی قازدون یزید
اعتنا من ائتمرم تهدیدوه ؛ پرخاشوه
آند اولا عباسیمه تختون چوئیرم باشوه

کیمدی بو عورت دئدی ؛سسلندی ظالم زینبم
هانسی زینب سن؛ دئدی برج ولاده کوکبم
چاشدی هند اوغلی دئدی قدرتده منده مرحبم
آغزوی باغلا دئدی مرحبلره باش ایمرم
مرحب اولسون سن اگر؛ من ذوالفقار حیدرم

یا حیدر یاحیدر یاحیدر