أبويه ابنومي عودني يوسدني عله ايمينه
أشم ابكل فجر نحره واشوفن صورتي ابعينه
ولمن عالرحيل أنوه يريد الكربله السفره
وكفت ابحيرتي اكباله اشوف اعيونه متغيره
شفت بيها ضمه واطفال و نار ابخيم متوجره
صحت يابويه خبرني گبل ما تطلع اضعونك
اشوف امصاب ما مشيوف وراس برمح بعيونك
گلبي ايگول عدوانك من توصل يذبحونك
يا بويه وعلى غفله لنك يمي ما موجود
أنشد عمتي زينب و اتگلي ابسفر وايعود
يالغالي الدرب جيتك خليت النظر مشدود
حلمي الذّبل اجفوني ما خله عليه ادموع
ابطشت الذهب كل ليله اشوفن راسك المگطوع
بخرابه الشمر يحرسنه و اعيال وايتامه اتلوع
بعيونك شفت موتي من المهد يبرالي
ودموعك تواسيني كل ما تكعد اگبالي
لاكن راسك المگطوع ماخاطر على بالي
غده بيه العب للنوم و سيّر طيفك اعليه
نسّاني الحزن كله ولا جن جيت مسبيه
ابلحظه وغاب عن عيني فزز كل جرح بيه
فزيت وصحت بويه و الظالم سمع نوحي
ودالي بطشت رأسك گصده يلچم اجروحي
مثلك گطعوا أنفاسي و الروحك مشت روحي
الشاعر: السيد سعيد الصفي الرميثي
