حسینه مریدینه دوزخ ندی عذاب ندی

حسینه مریدینه دوزخ ندی عذاب ندی
حسینه آغلیانا محشر و حساب ندی

سیلردی روح الامینتر حسینین آلنوننان
دییردی ایندی توشوندوم کی آفتاب ندی

بونوندا یوخدی نظیری خدای منان تک
اگر او لیس کمثله دی بو جناب ندی

حسین غمینده ایکی قطره اشک بازاره
گتور که مشتری درک ایلسون گلاب ندی

حسینی هیچ بنی آدمیله ایتمه قیاس
که بحر جنبش ائدن عرصه ده حباب ندی

حسین غمینده ویرون رشته ی کلامی منه
که مستمع گوره درّ اصیل و ناب ندی

منیم قریحمه شهپر ویروب حسینون آدی
منیم قریحم اوچان جوّیده عقاب ندی

کلاس عشق حسین توشدوغی چوخور یردی
یازیل او مکتبه گور سؤز ندی کتاب ندی

طنابه باغلا منی دشت کربلایه سوری
خیر سوروننم اوزوم عشقیلن طناب ندی

چوخ انقلاب گوروبسن ولی دیینده حسین
وجود زینبه بیر باخ گور انقلاب ندی