ابعث دمعتي القبرك يااباالحسن وتخبر
راحوا بنينك يا حيدر.. راحوا بنينك
عين الجلالة تنظرك والباري عظم اجرك
راحوا بنينك يا حيدر .. راحوا بنينك
هاي انا امهم حرموني منهم
***
أولادك ياحيدر خيمة اسراري .. دار البي تربوا دارك وداري
الك عنهم أوصل آخر أخباري.. دمهم مثل دمك يا علي جاري
صحت والضيم سجّر بالقلب ناري.. ياحيدر يعظم أجرك الباري
أولادك وتدريهم ..انت الذي امربيهم
حملوا صفاتك ياحيدر ..حملوا صفاتك
لو ناشدتني عليهم ..كل المراجل بيهم
عزك عزمهم.. حرموني منهم
***
شلون أربع غوالب جبل واحدهم.. مرضعهم على الطيبات عوّدهم
***
كل معنى المراجل تلتقى عدهم.. يكفيهم يحيدر انت والدهم
عشت متنومسة ومتمهلة بسدهم.. ماحسبت عن الموت يبدهم
دنيانة قطعت ظني هاليلة غابت عني
اربع ضياغم يا حيدر اربع ضياغم
يشنعي بخيبي وهمي والدنيا اخذت مني
اريع ضياغم ياحيدر اربع ضياغم
حيرني همهم حرموني منهم
***
خبر يعقب رزايا القبرك الوافي .. وجبال الهموم محيملات عليك
يحلال الشدايد مهجتي اتنادي .. مو بس انا ابعث هالتعازي ليك
الليلة الكون كله ياعلي يعزيك.. وابفقد البنين الاربعة يواسيك
العالم يبث اشجانه.. حتى العرش وأركانه
تبجي على حالك ياحيدر.. تبجي على حلك
جن وإنس حزنانة.. تجري الدمع ويانه
تبجي على حالك يا حيدر نبجي على جالك
تلهج بسمهم حرموني منهم
***
على مصابك ينوح العالم بأسره.. تواسيك الإنس والجان بالعصرة
يبوالحملة بعدها براسك السطرة.. وبعده الدم يسيل وينزف المجرى
قبل ما طبرتك تضمد يابوالعترة .. اجت لوعة مصيبة كربله الكبرى
مصرع بنينك صابك..
الله يصبرك ياحيدر الله يصبرك
ريت الدليل صوابك ولاهالحزن ينتابك
الله يصبرك ياحيدر الله يصبرك
وانا بفقدهم حرموني منهم
****
يامن قلبك يحيدر للصبر منجم
فقدت اربع طوالع والزمان ظلم
تركوا اربع جروح تفيض هم و غم
شلون جروح لاتبره ولا تلتم
اخيط واحد الثاني يتنازف دم
لايرهم عليهن دوه ولا مرهم
فقد البنين جروحي .. من عيني نشفة موحي
نار المصايب يا حيدر نار المصايب
شيطفي جمرة نوحي يسعر لظاها بروحي
نار المصايب يا حيدر نارالمصايب
قلبي حزنهم حرموني منهم
***
بديلي الضيم نايم نومة السبعة..وابمرعة الجبد نوق الحزن ترعة
وحين اللي رجع ناعي الأجل ينعى ..صحت يا ربي سترك ضاقت الوسعة
خنك روحي ابصبرها وفجر الدمعة.. طفه عيني مثل ما تنطفي الشمعة
صوت الجدر ينعاهم.. وتغسلوا بدماهم
عنهم اخبرك ياحيدر عنهم اخبرك
تراب اللحد واراهم.. ريت اندفن وياهم
عنهم اخبريك يا حيدر عنهم اخبرك
شيحمل هضمهم حرموني منهم
***
حده حادي المناية وسكنوا التربان.. عبدالله واخوته جعفر وعثمان
لون تنشد يحيدر عن قمر عدنان..وكع صوب الشريعة مقطع الذرعان
وراية الجنت بيها ترهب الفرسان.. ضلت ياعلي مرمية بالميدان
الشاعر: الأديب جابر الكاظمي
