احـسين يا روح البتول الطاهره
إنـتـه يـمـولانه دنيه و آخره
***
آخـره و دنـيه محبتك يا شهيد
ابـدنيه بيك الملتزم عايش سعيد
و آخـره منجاته من يوم الوعيد
يـا حـبيب المصطفه خير الوره
***
يا حبيب المصطفه و روح البتول
الدنيه هاي اتزول حبك ما يزول
يا من بيك احتارت أرباب العقول
مـا نـره مـثلك يضامي ما نره
***
ما نره مثلك يضامي و لا نشوف
شخص مفرد مثلك اتحده الألوف
بالطفوف اشلون و قفه البلطفوف
خـلـت الألـباب لسه حايره
***
اشـلون وقفه الخلت اعيون المله
مـن بـقاع الكون تربي الكربله
يا هو مثلك اسمك بالكون اعتله
مـن بـعـد ما طاح اعله الثره
***
يـا غريب اشتهر مثلك بالإسم
يـا شهيد اتخلد ابروح و جسم
و يا جريح الجرحه شفه و تبتسم
غيرك شخصك يبو القبه الزاهره
الشاعر: هيثم سعودي الكربلائي
