الطير إنتحر...و الماي اعتذر...يم نحر الإمامة
و اقلوب البشر...أقسه من الحجر...ظلت للقيامة
هالقصة العجيبة...شاهد عالمصيبة
اشتمه...صلّه يم دمه...غطه جرحه...بريح جنحه
صوته...غّرد الموته...قله فزتُ...ما خسرتُ
كبّر...منه يتعّذر...ما نصرتك...من حضرتك
من راس الرمح...الجسمه المنذبح...طاير يعتني له
يا طير بجنح...لا تلجم جرح...نادت له العقيلة
حاضر يا غريبه...شاهد عالمصيبة
اتعذب...عاين الزينب...جن سألها...عالكفلها
وينه...العاهد اسكينه...خل أشوفه...بجنحي أطوفه
صدت...بالدمع ردّت...عالشريعة...بجف قطيعة
يا طير اسأله...من توصل إله...ليش اختك عفتها
ما بين الغرب...زينب تنضرب...و انت اتكفلتها
مسبية و سليبة...شاهد عالمصيبة
إحساسه...يحاجي عباسه...خاف أزعلك...من أقلك
حسينك...الأغله من عينك...إنداس صدره...إنذبح نحره
و إختك...الجاية ببختك...من أميرة...اترد أسيرة
فك عينه و نشد...يا طير اشبعد...يا شدة و رزية
قله اتحيرت...و أصعب ما شفت...من ضاعت رقية
إحساسه بحبيبه...شاهد عالمصيبة
عافه...قبّل إشفافه...جنحه جابه...اعله الصحابه
مرهم...يبجي من قلهم...حسين نحره...برمح نصره
بالطف...الزمن ما أنصف...بالسبية...الهاشمية
نيران بخيم...جف ابلا علم...هذا المر عليها
صعدت عالهزل...مشدودة بحبل...مجتوفة ايديها
حيدر كون أجيبه...شاهد عالمصيبة
اتغير...و الفرات أحمر...ماي نهره...فوق نحره
اتعنه...يعتذر منه...قله صبرك...كتب نصرك
تقدر...تشرب الكوثر...لكن انته...ما شربته
ما عايل تره...بسبع القنطرة...و الجف ما قطعته
و الماي اشتعل...من نار الخجل...تعرف من وصلته
ما يخمد لهيبه...شاهد عالمصيبة
جاني...وقف حاجاني...عطّشتني...عذّبتني
قلت له...قبّلت رجله...ما هو ذنبي...و حق ربي
اعذرني...العطش مو مني...هالقضية...امن آل أمية
لو بيدي قسم...جبته اعله الخيم...كل عذبي و فراتي
و لا شوفن طفل...ضامي و ينقتل...و أندم كل حياتي
و أنحب وي نحيبه...شاهد عالمصيبة
أشهد...ما جره اعله أحد...هالجراله...و عله اعياله
ابعلمي...من وصل يمي...اشكثر ترغب...قلت اله اشرب
اتذكر...يا ضمه الخدر...قام عني...و ما شربني
يالشفته اوصلت...منه اتعذرت...من اجفوفه ذبني
قام و ما شرب...جن نار بحطب...جبده و ما شربني
هالغيرة الرهيبة...شاهد عالمصيبة
الشاعر: ناظم الحاشي
